Kynbundinn launamunur minnkar samkvæmt nýrri rannsókn

Kynbundinn launamunur hefur dregist saman á árabilinu 2019 – 2023 hvort heldur litið er til atvinnutekna, leiðrétts eða óleiðrétts launamunar. Þetta kemur fram í nýrri rannsókn Hagstofu Íslands Ã¡ launamun karla og kvenna. Jafnréttismál munu flytjast til dómsmálaráðuneytisins þann 1. mars frá félags- og vinnumarkaðsráðuneytinu en dómsmálaráðherra hefur þegar tekið við forræði málaflokksins.  

Í niðurstöðum rannsóknarinnar kemur fram að á tímabilinu hafi munur á atvinnutekjum karla og kvenna minnkað um 3,6 prósentustig. Óleiðréttur launamunur á tímakaupi reglulegra heildarlauna hefur minnkað um 4,6 prósentustig og leiðréttur launamunur hefur minnkað um 0,8 prósentustig sbr. meðfylgjandi yfirlit.

Óleiðréttur launamunur - tímakaup reglulegra heildarlauna

Leiðréttur launamunur metur hvort karlar og konur með sambærilegan bakgrunn og í sambærilegum störfum fái sambærileg laun. Leiðréttur launamunur árið 2023 var mestur meðal starfsmanna á almennum vinnumarkaði 4,5% , meðal ríkisstarfsmanna var munurinn 3,0% og meðal starfsfólks sveitarfélaga var munurinn 0,6%.

Þorbjörg Sigríður Gunnlaugsdóttir dómsmálaráðherra er ánægð með þá jákvæðu þróun að launamunur milli kynjanna sé að jafnast. Aftur á móti telur hún að stjórnvöld þurfi alltaf að vera vakandi fyrir fjölbreyttum leiðum til að ná árangri:

„Nú felst helsta áskorunin í vanmati á hefðbundnum kvennastörfum miðað við hefðbundin karlastörf. Næstu skref eiga að vera að leiðrétta kerfisbundið vanmat á virði kvennastarfa“.