Guvernatori Sejko takon Përfaqësuesin e ri Rezident të BERZH-it në Shqipëri, z. Hannes Takacs

Më 13 korrik 2026, Guvernatori i Bankës së Shqipërisë, z. Gent Sejko, priti në një takim zyrtar delegacionin e Bankës Evropiane për Rindërtim dhe Zhvillim (BERZH), të kryesuar nga z. Hannes Takacs, Përfaqësuesi i ri Rezident i BERZH-it në Shqipëri, i shoqëruar nga zj. Ekaterina Solovova, si dhe përfaqësues të tjerë të të dy institucioneve.

Në fillim të takimit, Guvernatori Sejko i njohu përfaqësuesit e BERZH-it me zhvillimet më të fundit ekonomike dhe financiare në vend. Ai u shpreh se, sipas parashikimeve të Bankës së Shqipërisë, ekonomia shqiptare pritet të vijojë të rritet me ritme solide edhe gjatë periudhës në vijim.

Guvernatori theksoi se politika monetare e kujdesshme dhe konsistente e ndjekur nga Banka e Shqipërisë ka dhënë një kontribut të rëndësishëm në ruajtjen e stabilitetit makroekonomik, duke krijuar kushte financiare të favorshme për zhvillimin e qëndrueshëm të ekonomisë.

Lidhur me sektorin bankar, ai nënvizoi se sistemi mbetet i qëndrueshëm, me tregues të mirë kapitalizimi, likuiditeti dhe përfitueshmërie. Gjithashtu, raporti i kredive me probleme, në nivelin 3.7%, përfaqëson nivelin më të ulët historik që nga viti 2008.

Sipas Guvernatorit, ky rezultat pasqyron efektet e reformave strukturore të ndërmarra gjatë dekadës së fundit, përmirësimin e disiplinës financiare të industrisë bankare, si dhe efektivitetin e kuadrit rregullator dhe mbikëqyrës të Bankës së Shqipërisë.

Më tej, Guvernatori Sejko vlerësoi marrëdhëniet shumë të mira të Shqipërisë me BERZH-in dhe falënderoi institucionin për mbështetjen e vazhdueshme në realizimin e projekteve me rëndësi strategjike për zhvillimin ekonomik dhe financiar të vendit.