MALELEGA MAI LANA AFIOGA I LE AO MAMALU O LE MALO – TUIMALEALIIFANO VAALETO’A SUALAUVI II MO LE KERISIMASI 2025

Le Paia o Fa’auluuluga o Ekalesia Kerisiano uma i Samoa

A outou afioga i Sui o le Fono a Sui Tofia;

Lau afioga i le Alii Palemia ma le Kapeneta, faapea Minisita Lagolago;

Lau afioga i le Faamasino Sili ma Alii ma Tamaitai o le Faamasinoga;

Lau afioga i le Fofoga Fetalai ma Sui Mamalu o le Palemene;

Faauluululuga o Matagaluega ma Faalapotopotoga a le Malo,

Le Paia o le Aufaigaluega Totofi a le Atua;

Le Malutaue’e o Samoa i le afua mai i Mauga tetele seia paia mauga iti. O le paia lava lea auā Tama ma Aiga, o Aiga foi ma Tama.

Le Usoga a Tumua ma Pule, Ituau ma Alataua, Aiga i le Tai ma le Vaa o Fonoti.

E taliu foi ae popo’e leaga e faigata le tapuaiga mau a le faigamalo a Tutuila ma Manu’a. I le afio o le Afioga i le Alii Kovana ma le Kovana Lutena, aemaise le paia maualuga o le Tafatolu o lana Faigamalo. O le paia lava lea auā Sua ma le Vaifanua, Fofo ma Aitulagi, Saole ma le Launiu Saelua. Afifio Faatui, Tootoo o le Faleula ma Upu i le Manuatele. Ua faamalo le soifua manuia.

O lea ua gaga ifo le la o lau folauga Samoa i lenei tausaga. Ua mapu foi i falamatū lau faatufugaga, ina ua taufai puea le matila ma le ofeloa a tautai o le vasa. Ua itea foi le malama nai Saua ina ua ilo fanuaalalo ma ua toe o se aga ona tua’au lea o le ausaga i le faamanatuina o le Kerisimasi o lenei tausaga 2025, e patipatia ai le soifua mai o le pepe fou, e pei ona valoia e le Evagelia a Luka. (Luka 2:11). “Auā o le aso nei ua fanau ai iā te outou i le aai a Tavita le Faaola, o ia o Keriso le Alii.” ma o le ‘auau lena o se feau tau molimoli o lenei kerisimasi.