SAUNIGA ALOAIA O LE TATALAINA O LE NOFOAGA TAU A’OAOGA MO OTAOTA LAFOA’I [Aso Faraile 19 Tesema 2025]

SAUNOAGA AUTU a le afioga i le Minisita o le Matagaluega o Punaoa Faalenatura ma le Siosiomaga Hon. Ale Vena Ale

Sūsū lau Susuga i le ta’ita’i o le Sauniga, Pastor Peter Amosa, Assembly of God Siusega,

Afifio Afioga i Minista o le Kapeneta faapea Minisita lagolago,

Afio lau Afioga i le Amepasa o le Malo o Farani, Guillaume Lemoine

Afio le Faaululuga o le Faalapopopotoga Siosiomaga ile Pasefika (SPREP),

Sūsū sui o Matagaluega a le Mālō ma Poloketi Fesoasoani,

O upu ua masani ai aso faapenei, “o se ua fiafia ina pese ia” o lagona ia, ua fusifuisa ai lenei taeao, aua ua tepa i ula, ua tagai i ula, ua futifuti a manu ula i le alofa ma le agalelei taumulimuli o le Atua, aua ua mafai ona tatou feiloai i lenei aso i luma o nu’u, ae lē o tua o nu’u. O se aso sa taupòina, ole aso sa lupe, sa taumate foi ile ete le faamoemoe pe tatou te aulia ile manuia. A o lea ua tini paò le uto e pei o le upu i faiva o vai, ua taumailelei foi e pei ole igoaipu a Leuluaialii.

Ae o le auga ma le fa’amoemoe o le asō, ua tatou ofaga potopoto mai, se’i o tatou molimauina le tatala aloa’iaina o se tasi o atina’e taua mo le faafoeina lelei o le auaunaga mo Lapisi ma Otaota Lafoai. E le o toe po malae i faafitauli ogaoga ua feagai ma le lalolagi – e aofia ai aafiaga mai suiga ole tau, faaitiitia o le ola faanatura faapea kasa ma vailaau oona mai otaota ma lapisi lafoai.

Ua maitauina le siitia o le tulaga ua iai lapisi ma otaota lafoai i Samoa. O se suesuega lata mai, tau lapisi ma otaota na faatino mo Samoa ile tausaga 2020, na atagia mai ai le tulaga faaletonu ua iai le faatupulaia ole lapisi, e pei ona iai faamaumauga nei:

• 27 miliona kilokalama o otaota lafoai ile tausaga

• Peitai ane, e i lalo ifo ole 3% o lenei fuainumera e toe faaoga (recycled)

• O lenei nofoaga o loo lafoai ai lapisi ma otaota i Tafaigata o le a leai se avanoa e lafoai ai le lapisi i leisi 10 tausaga o lumanai (2035).