Starfshópur leggur til þrjár breytingar á kosningalögum

Dómsmálaráðherra hefur sent forseta Alþingis bréf með skýrslu starfshóps um aukið jafnræði og þingsætadreifingu.  Hópurinn var skipaður í október á síðasta ári og skilaði endanlegri skýrslu til ráðuneytisins í júlí s.l. Í bréfinu leggur ráðherra til að stofnuð verði þingmannanefnd til að fjalla um tillögur starfshópsins.

Ólafur Þ. Harðarson, prófessor emeritus í stjórnmálafræði við Háskóla Íslands, leiddi vinnu hópsins en auk hans voru í honum þau Sigrún Helga Lund, prófessor í tölfræði við Háskóla Íslands, og Þorkell Helgason, prófessor í stærðfræði.

Starfshópurinn leggur til þrjár breytingar á kosningalögum. Í fyrsta lagi að kjördæmissætum verði fækkað niður í sex sæti í hverju kjördæmanna sex og að hin 27 þingsætin verði jöfnunarsæti.

Í öðru lagi er lagt til að þingsætum verði í heild ráðstafað hlutfallslega jafnt til kjördæmanna miðað við tölu kjósenda á kjörskrá og í þriðja lagi að ákvæðum um útdeilingu jöfnunarsæta til einstakra kjördæmislista verði breytt í þeim tilgangi að gera úthlutun stöðugri og líkari hreinni kjördæmisúthlutun sæta.