Mælti fyrir tveimur þingmálum

Ragnar Þór Ingólfsson, félags- og húsnæðismálaráðherra, mælti í dag fyrir þingsályktunartillögu um framkvæmdaáætlun í málefnum innflytjenda fyrir árin 2026-2029 sem og frumvarpi sem miðar að því að styrkja rannsókn alvarlegra óvæntra atvika í velferðarþjónustu.

Virk þátttaka óháð þjóðerni og uppruna

Framkvæmdaáætlun í málefnum innflytjenda er lögð fram til fjögurra ára og hefur að markmiði að stuðla að samfélagi þar sem allir einstaklingar geta verið virkir þátttakendur óháð þjóðerni og uppruna.

Samkvæmt lögum um málefni innflytjenda skal ráðherra leggja fram á Alþingi slíka þingsályktunartillögu til fjögurra ára í senn að fenginni umsögn annarra ráðuneyta, stofnana, Vinnumálastofnunar og innflytjendaráðs.

Í áætluninni eru 24 aðgerðir sem skiptast í fimm megináherslur:

Þingsályktunartillagan byggir á ítarlegu stöðumati og greiningu á brýnustu aðgerðum til að ná fram þeim markmiðum sem lög um málefni innflytjenda kveða á um. Staða í málefnum innflytjenda var metin og birt í grænbók í málefnum innflytjenda og flóttafólks í nóvember 2023. Henni var svo fylgt eftir með hvítbók í maí 2024, samhliða því sem Efnahags- og framfarastofnunin (OECD) framkvæmdi úttekt um innflytjendur á Íslandi.

Þá var við mótun aðgerða í þingsályktunartillögunni byggt á samtali við innflytjendur sjálfa á fundum sem haldnir voru vítt og breitt um landið.