Ársskýrsla um sýklalyfjanotkun og sýklalyfjanæmi baktería á Íslandi

Heildarsala sýklalyfja hjá mönnum árið 2025 dróst saman um 4,6% frá fyrra ári en notkunin er þó enn meiri hér á landi en annars staðar á Norðurlöndunum. Sýklalyfjaónæmi er enn almennt lítið á Íslandi í evrópskum samanburði en þróun ákveðinna gerða ónæmis veldur áhyggjum. Þetta er meðal þess sem lesa má í nýbirtri ársskýrslu um sýklalyfjanæmi baktería hjá mönnum og dýrum á Íslandi árið 2025.

Fjallað er um skýrsluna í tilkynningu á vef embættis landlæknis þar sem skýrslan er jafnframt aðgengileg. Sóttvarnalæknir segir niðurstöðurnar undirstrika mikilvægi áframhaldandi vöktunar og samstarfs stjórnvalda sem fara með heilbrigðismál, umhverfismál og heilbrigði dýra.