Mælt fyrir nýjum heildarlögum um sveitarstjórnir: Víðtækar breytingar styrki sveitarstjórnarstigið

Eyjólfur Ármannsson innviðaráðherra mælti á Alþingi í gær fyrir frumvarpi að nýjum heildarlögum um sveitarstjórnir en í því felast víðtækar breytingar frá gildandi sveitarstjórnarlögum. Frumvarpið var lagt fram á Alþingi á síðasta vorþingi en var nú endurflutt með minniháttar breytingum.

Markmið frumvarpsins er sem fyrr að styrkja og styðja við sveitarstjórnarstigið á Íslandi með því tryggja að sveitarfélög um allt land séu öflug, sjálfbær og vel í stakk búin til að takast á við umfangsmikil verkefni og tryggja íbúum faglega og skilvirka grunnþjónustu.

„Frumvarpið tekur á grunngerð sveitarstjórnarstigsins, fjármálum þess, samstarfsformum og lýðræðislegu aðhaldi með sveitarfélögum. Allar breytingar miða að einu og sama markmiði – að styrkja sveitarstjórnarstigið. Tilgangurinn er að skapa betri forsendur fyrir öflug og sjálfbær sveitarfélög. Rannsóknir sýna að þjónusta við íbúa er almennt betri og skilvirkari í fjölmennari sveitarfélögum. Með frumvarpinu stígum við skref að nútímalegra og skilvirkara sveitarstjórnarstigi sem er betur í stakk búið til að takast á við verkefni framtíðarinnar, íbúum sínum til hagsbóta,“ segir Eyjólfur Ármannsson innviðaráðherra

Heildarlög og fallið frá lágmarksíbúafjölda

Unnið hefur verið að endurskoðun sveitarstjórnarlaga um alllangt skeið með víðtæku samráði við almenning og hagaðila og í náinni samvinnu við sveitarstjórnarstigið og landshlutasamtök.