Leiðtogar Grænlands og Færeyja funda með forsætisráðherra á Íslandi

Ríkisstjórnaroddvitar vestnorrænu landanna þriggja, Íslands, Grænlands og Færeyja, munu funda á Íslandi miðvikudaginn 7. október í boði Kristrúnar Frostadóttur forsætisráðherra. Jens Frederik Nielsen, formaður grænlensku landsstjórnarinnar, og Beinir Johannesen, lögmaður Færeyja, munu eiga samráðsfund með forsætisráðherra, auk þess sem þeir munu kynna sér aðstæður á öryggissvæðinu á Keflavíkurflugvelli og eiga fund með alþjóðlegum fjárfestum sem einblínt hafa á tækifæri á vestnorræna svæðinu og Norðurslóðum.

„Það er afar ánægjulegt að geta tekið á móti fulltrúum okkar næstu nágrannaþjóða og rætt við þá um sameiginlega hagsmuni okkar og sérstöðu hér í Norður-Atlantshafi og á Norðurslóðum,“ segir Kristrún Frostadóttir forsætisráðherra.

„Vestnorræna svæðið sem löndin okkar tilheyra hefur verið fyrirferðarmikið í umræðu um alþjóðamál á undanförnum misserum. Við sem hér búum förum ekki varhluta af þeim kerfislægu öryggisáskorunum sem ríkja á Norður-Atlantshafi og tökum ábyrgð okkar þar alvarlega. Það er mikilvægt að við eigum samráð um stöðu þessara mála - og ekki síður að við ræðum þau miklu tækifæri sem svæðið okkar hefur upp á að bjóða,” segir forsætisráðherra.