Nkom opnar tilsyn med Telenor etter SIM-kortfeil

Nasjonal kommunikasjonsmyndigheit (Nkom) ber Telenor om ei utgreiing etter at ei rutinemessig oppdatering førte til at rundt 20 000 SIM-kort slutta å fungere.

Nkom vil gjennomføre tilsyn med Telenor etter at rundt 20 000 SIM-kort slutta å fungere i samband med ei teknisk oppdatering.

Telenor varsla Nkom om hendinga 29. september. Selskapet opplyste at feilen oppstod i samband med ei rutinemessig teknisk oppdatering i mobilnettet. 

Ifølgje Telenor blei om lag 20 000 SIM-kort råka. Nkom vil no følgje opp hendinga og har sendt Telenor varsel om tilsyn. 

– Vi vil undersøkje nærare kva som førte til at så mange SIM-kort slutta å fungere, og korleis hendinga blei handtert. Tilsynet skal òg avklare om Telenor har overhalde krava til forsvarleg tryggleik etter ekomlova, seier seksjonssjef Sander Norrøne Ask i Nkom.

Nkom vil gjennom tilsynet be Telenor om ei skriftleg utgreiing om kva som skjedde, og kva konsekvensar hendinga fekk. 

Tilbydarar av elektroniske kommunikasjonstenester har ansvar for å sørgje for forsvarleg tryggleik i nett og tenester. Nkom fører tilsyn med at krava i ekomregelverket blir etterlevde. 

Det er for tidleg å seie om tilsynet vil føre til reaksjonar. 

– Vi må vente på resultatet av tilsynet før vi kan vurdere om det er grunnlag for reaksjonar, seier Sander Norrøne Ask.