Ráðstefna um áfallamiðaðar nálganir

Þorbjörg S. Gunnlaugsdóttir, dómsmálaráðherra, ávarpaði í morgun ráðstefnuna Traust í fyrirrúmi: áfallamiðaðar nálganir (e. Starting with Trust: trauma-informed pathways to resilience). Ráðstefnan er haldin í Háskólanum í Reykjavík og er liður í formennsku Íslands í Eystrasaltsráðinu.

Á ráðstefnunni er fjallað um áfallamiðaðar nálganir við að byggja upp traust og seiglu barna í viðkvæmri stöðu og þolenda mansals. Fjölbreyttur hópur fyrirlesara er með erindi á ráðstefnunni en aðalfyrirlesari er Rachel Witkin frá Bretlandi. Witkin hefur meira en 25 ára reynslu af því að vinna með þolendum mansals.

Dómsmálaráðuneytið, mennta-og barnamálaráðuneytið, Barna-og fjölskyldustofa og Háskólinn í Reykjavík standa að ráðstefnunni. Þátttakendur koma frá öllu Eystrasaltssvæðinu, meðal annars fræðafólk, fagfólk og fulltrúar alþjóðastofnana sem starfa að málefnum barna í viðkvæmri stöðu og þolenda mansals.

Aðgerðahópur Eystrasaltsráðsins gegn mansali fundaði í gær í tengslum við ráðstefnuna og á morgun verður fundur hjá sérfræðingahópi Eystrasaltsráðsins um börn í hættu.

Eystrasaltsráðið var stofnað árið 1992. Þar eiga sæti Norðurlöndin fimm, Eystrasaltsríkin, Pólland, Þýskaland og Evrópusambandið. Skrifstofa ráðsins hefur aðsetur í Stokkhólmi og á vettvangi þess fer fram margþætt samstarf aðildarríkjanna um málefni á borð við barnavernd, almannavarnir og aðgerðir gegn mansali.

Ísland tók við formennsku í ráðinu í júlí. Utanríkisráðuneytið stýrir formennskunni en nýtur fulltingis dómsmálaráðuneytis, mennta- og barnamálaráðuneytis, umhverfis-, orku- og loftslagsráðuneytis, almannavarnadeildar ríkislögreglustjóra og Barna- og fjölskyldustofu í störfum vinnuhópa.