My Voice, My Choice hlaut Vigdísarverðlaunin

Slóvenska grasrótahreyfingin My Voice, My Choice hlaut í dag alþjóðleg jafnréttisverðlaun sem kennd eru við Vigdísi Finnbogadóttur, Vigdís Prize for Women Empowerment, við hátíðlega athöfn í Strassborg. Verðlaununum fylgir 60 þúsund evrur í verðlaunafé og verðlaunagripurinn Kvika, listaverk eftir Brynhildi Þorgeirsdóttur sem er unnið úr íslensku hrauni og gleri. 

„Vigdísarverðlaunin minna okkur á að framfarir í jafnréttismálum verða ekki af sjálfu sér. Þær byggja á hugrekki, hugsjón og fólki sem er tilbúið að ryðja brautina fyrir aðra. Með verðlaununum veitum við mikilvægu starfi alþjóðlega athygli og hvetjum fleiri til að leggja sitt af mörkum í jafnréttisbaráttunni,“ segir dómsmálaráðherra. 

Berjast fyrir jöfnu aðgengi að þungunarrofi 

My Voice, My Choice er grasrótarhreyfing frá Slóveníu sem berst fyrir yfirráðarétt kvenna yfir líkama sínum og jöfnu aðgengi að þungunarrofi. Samtökin hafa haft töluverð áhrif á framvindu mála í Evrópuþinginu og hafa þegar safnað 1,2 milljónum undirskrifta.

Dómsmálaráðherra ásamt Lönu Čop frá My Voice, My Choice

Verðlaunin eru samstarfsverkefni Evrópuráðsþingsins og ríkisstjórnar Íslands. Þeim er ætlað er að vekja athygli á einstaklingum, stofnunum eða samtökum sem hafa stuðlað að valdeflingu kvenna með framúrskarandi hætti. Horft er meðal annars til verkefna sem stuðla að jafnrétti kynjanna, jafnari samfélagslegri þátttöku kvenna eða sem vekja athygli á ójafnri stöðu kvenna og hvetja til úrbóta.