Utanríkisráðherra skipar fjóra í embætti sendiherra

Þorgerður Katrín Gunnarsdóttir utanríkisráðherra hefur ákveðið að skipa Elínu Rósu Sigurðardóttur, Jónas G. Allansson, Maríu Mjöll Jónsdóttur og Ragnar G. Kristjánsson í embætti sendiherra án staðarákvörðunar samkvæmt 1. mgr. 9. gr. 39/1971 laga nr. 39/1971 um utanríkisþjónustu Íslands. Um er að ræða fyrstu skipanir í embætti sendiherra á grundvelli 1. mgr. 9. gr. laga nr. 39/1971 eftir að breytingar voru gerðar á lögunum árið 2020. Skipanirnar hafa enga kostnaðaraukningu í för með sér fyrir ríkissjóð.

Ráðgefandi hæfninefnd skipuð samkvæmt 6. mgr. 9. gr. laga nr. 39/1971 um utanríkisþjónustu Íslands lagði mat á hæfni umsækjenda. Nefndina skipuðu Einar Gunnarsson sendiherra, Bergdís Ellertsdóttir sendiherra og Sigríður Margrét Oddsdóttir, framkvæmdastjóri Samtaka atvinnulífsins. 

Elín Rósa Sigurðardóttir, skrifstofustjóri þróunarsamvinnuskrifstofu, hefur starfað innan utanríkisþjónustunnar frá 2006 og hjá þáverandi undirstofnun ráðuneytisins, Þróunarsamvinnustofnun Íslands (ÞSSÍ) frá 2001. Hún hefur lokið grunnnámi í alþjóðasamskiptum og hagfræði frá Schiller alþjóðaháskólanum í Þýskalandi og er með meistaragráðu í alþjóðasamskiptum frá Boston háskóla. Hjá ÞSSÍ starfaði Elín fyrst sem skrifstofustjóri í Reykjavík og síðar sem umdæmisstjóri í Mósambík. Elín Rósa hóf störf í ráðuneytinu sem sérfræðingur á alþjóða- og öryggissviði. Frá 2013 var hún staðgengill sendiherra í sendiráði Íslands í Osló og svo staðgengill sendiherra í sendiráði Íslands í Berlín. Elín hefur starfað sem skrifstofustjóri þróunarsamvinnuskrifstofu utanríkisráðuneytisins frá árinu 2022.