Samtakamáttur hjá viðbragðsteymi bráðaþjónustu

Viðbragðsteymi bráðaþjónustu í landinu fer vel af stað. Megináherslan hefur verið  á að bæta stöðuna á bráðamóttöku Landspítala en samhliða því hefur ýmsum mikilvægum verkefnum til skamms og lengri tíma verið ýtt úr vör.

Heilbrigðisráðherra átti fund með starfsfólki bráðamóttökunnar í Fossvogi 14. júní síðastliðinn ásamt forstjóra Landspítala. Tilgangur fundarins var að upplýsa starfsfólk og ræða  stöðu mála. Ráðherra leggur áherslu á að halda áfram opnu samtali milli ráðuneytisins, viðbragðsteymisins, stjórnenda Landspítala og starfsfólks, sem ber hitann og þungann af álaginu.

Frá því að fundurinn var haldinn er búið er að ráða tvo erlenda sérfræðinga í bráðalækningum til starfa á bráðamóttökunni frá 1. júlí nk. og önnur úrræði voru kynnt sem nú þegar hafa raungerst og farið verður yfir hér á eftir. 

Fjarþjónusta bráðadagdeildar lyflækninga

Landspítali hefur komið á fót fjarþjónustu lyflækninga sem til að byrja með verður opin frá 8.00 á morgnana til 21.00 á kvöldin alla virka daga. Þar starfa hjúkrunarfræðingar og læknar sem taka við símtölum frá tilvísandi læknum á Læknavakt, heilsugæslum, öldrunarstofnunum og sjúkraflutningafólki. Markmiðið er að meta hvaða farvegur henti einstaklingum best og veita ráðgjöf. Már Kristjánsson, forstöðumaður lyflækninga- og bráðaþjónustu Landspítala segir þetta bæta þjónustu við sjúklinga jafnframt því að jafna álagið á bráðamóttöku spítalans (sjá viðtal við Má um fjarþjónustuna). Talið er að þetta fyrirkomulag geti fækkað komum sjúklinga á bráðamóttökuna um 10 – 15%.

Úrlestur myndrannsókna og greining blóðsýna fyrir ,,kragasjúkrahúsin“