Ti prosent av annonsane oppgir fleire soverom enn tillate

I januar 2026 undersøkte vi marknadsføringa av talet på soverom i bustadannonsar frå ti ulike eigedomsføretak. Føremålet var å sjå om marknadsføringa var i samsvar med krava i marknadsføringslova.

Marknadsføringa som vart undersøkt, var eit tilfeldig utval av 20 bustad- og 20 fritidsbustadannonsar frå heile landet, til saman 40 annonsar for kvart eigedomsmeklarføretak. Utvalet var avgrensa til brukte bustader og fritidsbustader, annonsar med høvesvis tre og fire soverom, eller fleire. Totalt undersøkte Forbrukartilsynet 400 annonsar.

Forbrukartilsynet fann at 40 av 400, altså ti prosent av annonsane, rekna fleire soverom enn det bustaden hadde då marknadsføringa vart gjort.  Nokre av romma som vart rekna var ikkje godkjent for varig opphald.

I enkelte tilfelle var ikkje dei oppgitte soveromma bygde på marknadsføringstidspunktet. I ein fritidsbustad fann vi til dømes at bustaden vart marknadsført med fire soverom, sjølv om kjøpar måtte byggje alle fire romma sjølv.

– Undersøkinga viser at meklarbransjen har rom for klarare og mindre villeiande informasjon i marknadsføringa av soverom. Vi fann feil i annonsane til alle dei ti meklarforetaka vi granska. Forbrukarane må kunne stole på at opplysningane dei får er korrekte, seier direktør i Forbrukartilsynet, Bente Øverli.

Informasjon om talet på soverom er sentrale opplysningar som ofte har avgjerande betydning for om bustaden er eit aktuelt objekt eller ikkje. Talet på soverom blir rekna som ei vesentleg opplysning om hovudeigenskapane til bustaden som må oppgivast i marknadsføringa.

Moglege og ubygde rom eller  rom som ikkje er lovleg for varig opphald (til dømes ei bu) kan ikkje telle med som soverom.  Slik rekning kan potensielt villeie forbrukarar til å ta økonomiske avgjerder dei elles ikkje ville ha teke. Dette er ulovleg marknadsføring.