Hjúkrunarheimilið Hlévangur opnað eftir endurbætur

Hjúkrunarheimilið Hlévangur í Keflavík hefur verið tekið í notkun á ný eftir gagngerar endurbætur. Haldið var upp á opnun heimilisins í gær þar sem gestum og gangandi gafst kostur á að skoða húsnæðið að loknum vel heppnuðum framkvæmdum. Þar eru 24 hjúkrunarrými og fyrstu íbúarnir eru þegar fluttir inn. Húsið er á tveimur hæðum með skjólríkum inngarði. Öll rými eru einbýli með sérbaðherbergi og á báðum hæðum eru bjartar setustofur fyrir íbúana.