Öndunarfærasýkingar - Vika 42 árið 2026

Greiningum inflúensu og COVID-19 fjölgar lítillega. Sýnatökum vegna öndunarfærasýkinga hefur einnig fjölgað síðustu vikur en hlutfall jákvæðra sýna lækkaði í síðustu viku miðað við vikuna á undan. Það er einkum samhliða fækkun á greiningum rhinoveira, sem hafa verið mest áberandi undanfarið. Engin RS-veira hefur enn greinst á þessu tímabili.

Sýnatökum vegna öndunarfærasýkinga fjölgaði um tæp 20% í viku 42 miðað við vikuna á undan. Hlutfall sýna sem greindust jákvæð fyrir öndunarfæraveirum lækkaði hins vegar úr um 47% í 34%, einkum samhliða fækkun greininga á rhinóveirum, sem hafa verið mest áberandi undanfarnar vikur.

Greiningum á inflúensu fjölgar áfram, en staðfest tilfelli eru þó enn tiltölulega fá. Greiningum á COVID-19 hefur einnig fjölgað. Engin tilfelli RS-veiru hafa greinst á þessu tímabili. Af öðrum öndunarfæraveirum greinast nú helst rhinoveira (kvefveira) og enteroveira.

Tölurnar byggja á sýnum sem send eru til rannsóknar og sem fyrr koma flest sýnin frá sjúkrahúsum. Fjöldi einstaklinga sem liggja á Landspítala með öndunarfæraveirusýkingu hefur aukist jafnt og þétt frá því í sumar.

Bólusetningar gegn inflúensu með nefúða eru hafnar fyrir börn á aldrinum 2-4 ára. Hefðbundið inflúensubóluefni fyrir börn frá 6 mánaða að 2 ára aldri og fullorðna er að fara í dreifingu og munu bólusetningar hefjast á næstu dögum.

Mælaborð sóttvarnalæknis um öndunarfærasýkingar hefur verið uppfært með gögnum út viku 42 árið 2026 (12.-18. október 2026).

Mynd 1: Fjöldi greininga á öndunarfæraveirum og fjöldi einstaklinga inniliggjandi á Landspítala með öndunarfæraveirur, sjá mælaborð.

Greiningum á inflúensu fer áfram fjölgandi. Fjölgun greininga á inflúensu er þó lítil milli vikna 41 og 42 og minni en sem nam aukningu í sýnatökum.