Ebólafaraldur í Afríku – áhætta fyrir almenning á Íslandi áfram mjög lítil

Sóttvarnastofnun Evrópu (ECDC) hefur birt nýtt áhættumat vegna áframhaldandi faraldurs ebólusjúkdóms af völdum Bundibugyo-veiru í Afríku. Faraldurinn hefur verið umfangsmestur í Lýðstjórnarlýðveldinu Kongó (hér eftir DRC), en nýlega hafa einnig greinst smit í Kenía og Nígeríu.

Þrátt fyrir aukna landfræðilega útbreiðslu faraldursins metur ECDC að áhætta fyrir almenning á Íslandi og annars staðar á Evrópska efnahagssvæðinu sé áfram mjög lítil.

Faraldurinn hófst í DRC í maí 2026 og hefur síðan breiðst út til átta héraða landsins. Samkvæmt upplýsingum ECDC höfðu 9.704 staðfest smit greinst þar þann 21. október og 4.687 einstaklingar látist. Smit hafa greinst í 66 heilbrigðisumdæmum, flest í héruðunum Ituri og Norður-Kivu, og útbreiðsla heldur áfram.

Í Kenía hafa greinst níu smit, þar af eitt dauðsfall. Átta einstaklingar smituðust af einstaklingi sem hafði ferðast frá DRC, þar á meðal fjórir heilbrigðisstarfsmenn. Í Nígeríu hefur greinst eitt smit hjá einstaklingi sem hafði ferðast frá Úganda. Smitrakning stendur yfir í báðum löndum.

Í Úganda greindust alls 20 smit fyrr á árinu, en faraldrinum þar var lýst lokið í ágúst.

Frá upphafi faraldursins hefur eitt innflutt smit greinst í Evrópu og þrír sjúklingar verið fluttir þangað sérstaklega til meðferðar. Allir fjórir voru heilbrigðisstarfsmenn sem höfðu starfað við hjálparstörf á sýktum svæðum. Þeir hafa allir náð bata og engin frekari smit orðið í Evrópu.

ECDC metur að áhætta fyrir almenna ferðamenn á sýktum svæðum í DRC, Kenía og Nígeríu sé lítil, svo fremi sem þeir fylgi ráðlögðum varúðarráðstöfunum. Áhætta er hins vegar meiri hjá heilbrigðisstarfsfólki og fólki við hjálparstörf sem starfar í nánum tengslum við sjúklinga eða á svæðum þar sem smit eru í útbreiðslu.